ಕಾರ್ಕಳ: ವಿದ್ಯಾರ್ಥಿಗಳ ಅಚ್ಚುಮೆಚ್ಚಿನ ಶಿಕ್ಷಕಿ – ನೃತ್ಯ ನಿರ್ದೇಶಕಿ ವಂದನಾ ರೈ

ರಕ್ಷಿತ್ ವಂಡ್ಸೆ/ಕರಾವಳಿ ಕರ್ನಾಟಕ ವರದಿ
ವಂದನಾ ರೈ–  ಕಾರ್ಕಳ ಬಜಗೋಳಿ  ನಲ್ಲೂರಿನ  ಹಮಣಿಬೆಟ್ಟುವಿನವರು . ಸುಂದರ ಶೆಟ್ಟಿ ಮತ್ತು ವನಜಾಕ್ಷಿ ದಂಪತಿಯ ಮಗಳು. ನಾಟಕ, ನೃತ್ಯ , ಸಂಗೀತ ಸ್ಪರ್ಧೆಗಳಲ್ಲಿ ಪ್ರಶಸ್ತಿಗಳ ಸುರಿಮಳೆ.

ಮಹಿಳಾ ಪದವಿ ಕಾಲೇಜಿಗೆ ಸೇರ್ಪಡೆಯ ನಂತರ  ಕಲಾ ಚಟುವಟಿಕೆಗಳಿಗೆ  ವೇಗ –  ಕಾಲೇಜು ಅಂತರ ಕಾಲೇಜು  ಸ್ಫರ್ಧೆಗಳಲ್ಲಿ  ಗೆಲುವಿನ ಹಿರಿಮೆ. ನೃತ್ಯ , ನಾಟಕ , ಛದ್ಮವೇಶ, ಏಕಪಾತ್ರಾಭಿನಯ ,  ಹೀಗೆ ರಂಗದಲ್ಲಿ ತಲ್ಲೀನರಾದರೆ  ಹಸಿವು , ನಿದ್ದೆ , ಊಟ , ತಿಂಡಿಯ ಪರಿವೆಯೇ ಇಲ್ಲದ ಕಲಾಪ್ರೇಮ .

‘ಮಯೂರಿ ನೃತ್ಯ  ತರಭೇತಿ’ಯನ್ನು ಹುಟ್ಟು ಹಾಕಿ  ಕಾರ್ಕಳದಲ್ಲಿ  ಮತ್ತು ಬಜಗೋಳಿಯಲ್ಲಿ  ಹಲವಾರು ಮಕ್ಕಳಿಗೆ ನೃತ್ಯ  ತರಭೇತಿ ನೀಡುತ್ತಿದ್ದಾರೆ.

ಈ ಟಿವಿಯ  ಸೂಪರ್ ಶ್ರೀಮತಿ ಸ್ಪರ್ಧೆಯಲ್ಲಿ  ಪ್ರಥಮ ಸ್ಥಾನ.  ಹೀಗೆ ನಿರಂತರ  ಸಾಧನೆಯ ಹೆಮ್ಮೆ. ಪ್ರಸ್ತುತ ಕಳೆದ ಎರಡು ವರ್ಷಗಳಿಂದ  ಕಾರ್ಕಳ ಜೇಸಿಸ್ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಕ್ರಿಯಾಶೀಲ ಶಿಕ್ಷಕಿಯಾಗಿ  ಶಾಲೆಯ ಸಾಂಸ್ಕೃತಿಕ ನಿರ್ದೇಶಕಿಯಾಗಿ ಕ್ಲಸ್ಟರ್, ತಾಲೂಕು , ಜಿಲ್ಲೆ , ರಾಜ್ಯ ಮಟ್ಟದಲ್ಲಿ ವಿದ್ಯಾರ್ಥಿ ಗಳ ಪ್ರತಿಭಾ ಪ್ರದರ್ಶನಕ್ಕೆ  ಮೆರುಗು ನೀಡಿ ಗಮನಾರ್ಹ ಸಾಧನೆಗೈದಿದ್ದಾರೆ.

ಝೀ ಕನ್ನಡದ – ಯಾರಿಗುಂಟು ಯಾರಿಗಿಲ್ಲ , ಕಸ್ತೂರಿ ಚಾನೆಲ್ – ರಾಣಿ ಮಹಾರಾಣಿ, ಬೆಳದಿಂಗಳ ಸಾಹಿತ್ಯ ಸಮ್ಮೇಳನದಲ್ಲಿ ಕರ್ನಾಟಕ ಯುವ ರತ್ನ  ಪ್ರಶಸ್ತಿ ಪುರಸ್ಕೃತರು.

Differently abled ಮಕ್ಕಳ ಮನವನ್ನೂ ಕಲಾ ಚಟುವಟಿಕೆಯ ಮೂಲಕ ಗೆದ್ದಿದ್ದಾರೆ.

ವಿದ್ಯಾರ್ಥಿಗಳ ಪಾಲಿಗೆ ಅಚ್ಚುಮೆಚ್ಚಿನ ಶಿಕ್ಷಕಿ.  ಆಕೆಯೋರ್ವ ನೃತ್ಯ  ನಿರ್ದೇಶಕಿ , ಉತ್ತಮ ಸಂಘಟಕಿ ಕೂಡ. ವಂದನಾ ರೈ ಅವರ ನೃತ್ಯಗಳಲ್ಲಿ  ಜೀವಂತಿಕೆಗೆ ಪ್ರಾಮುಖ್ಯತೆ. ಅವರ ವೈರಲ್ ಆಗಿರುವ ವಿಡಿಯೋ  ಕೆಲವು ಗಂಟೆಗಳಲ್ಲಿ ಸಾವಿರಕ್ಕಿಂತ ಜಾಸ್ತಿ ಲೈಕ್ ಪಡೆದಿದೆ.

ವಂದನ ರೈ ಮಕ್ಕಳಿಗೆ ಕನ್ನಡ ವರ್ಣಮಾಲೆಯ ಅಕ್ಷರ , ಒಂದರಿಂದ ಹತ್ತರ ವರೆಗಿನ ಅಂಕೆಗಳು, ವಾರದ ದಿನಗಳು ಮತ್ತು ಇನ್ನಿತರ  ವಿಷಯಗಳ ಬಗ್ಗೆ ವಿಡಿಯೋ ಮೂಲಕ ಮಕ್ಕಳಿಗೆ ಅರ್ಥವಾಗುವಂತೆ ಮಾಡಿದ್ದಾರೆ. ಇವರ ಜೊತೆ ಸಹ ಶಿಕ್ಷಕರು , ಮುಖ್ಯಶಿಕ್ಷಕರು ಸಹ ಭಾಗವಹಿಸುತ್ತಾರೆ.

ಮಗು ಇಷ್ಟ ಪಟ್ಟು ಕಲಿಯುವಂತಹ  ಹಾಡು , ನೃತ್ಯದ ಜೊತೆ ಅಕ್ಷರ ಅಭ್ಯಾಸ ಕಲಿಸಿದಾಗ  ಮಗು ಅತ್ಯಂತ  ಉತ್ಸಾಹದಿಂದ  ಬಹುಬೇಗನೆ ಪಾಠದ ವಿಷಯವನ್ನು ಅರ್ಥಮಾಡಿಕೊಳ್ಳುತ್ತದೆ ಎಂಬುದನ್ನು ಅವರು ಕಂಡುಕೊಂಡಿದ್ದಾರೆ. ಪಾಠವನ್ನು ಮನೋರಂಜನೆಯ ಮೂಲಕ ಮಕ್ಕಳಿಗೆ ಅರ್ಥವಾಗುವಂತೆ ತಿಳಿಸಿ ಮಾದರಿಯಾಗಿದ್ದಾರೆ.